Jo Hai Yan Aasaish-E-Ranj-O-Mehan Mein Mast Hai

Poet

jo hai yaan asaish-e-ranj-o-mehan men mast hai

kucha-e-janan men ham hain qais ban men mast hai

tere kuche men hai qatil raqs-gah-e-ashiqan

koi ghaltan sar-ba-kaf koi kafan men mast hai

mai-kade men bada-kash but-khane men hain but-parast

jo hai aalam men vo apni anjuman men mast hai

nikhat-e-zulf-e-sanam se yaan moattar hai dimagh

koi mushk-chin koi mushk-e-khutan men mast hai

hai koi mahv-e-namaz aur khum-kade men koi mast

dil mira ishq-e-butan-e-dil-shikan men mast hai

hai musalman ko hamesha ab-e-zamzam ki talash

aur har ik barhaman gang-o-jaman men mast hai

aks-e-ru-e-shama-ru hai mere dil men ja-guzin

dil mira is atish-e-lama-fagan men mast hai

hai mira har sher-e-tar ‘bahram’ kaisa pur-asar

jis ko dekho majlis-e-ahl-e-sukhan men mast hai