Jaisi Ab Hai Isi Haalat Mein Nahin Rah Sakta

Zafar Iqbal

jaisi ab hai isi halat men nahin rah sakta

main hamesha to mohabbat men nahin rah sakta

khul ke ro bhi sakun aur hans bhi sakun ji bhar ke

abhi itni bhi faraghat men nahin rah sakta

dil se bahar nikal aana miri majburi hai

main to is shor-e-qayamat men nahin rah sakta

kuuch kar jaa.en jahan se mire dushman ai dost

main vahan bhi kisi surat men nahin rah sakta

koi ḳhatra hai mujhe aur tarah ka ai dost

main jo ab teri hifazat men nahin rah sakta

chahiye hai mujhe kuchh aur hi mahaul ki main

aur ab apni rifaqat men nahin rah sakta

kuchh bhi main karta-karata to nahin huun lekin

bavajud is ke faraghat men nahin rah sakta

shak mujhe yuun to ḳhayanat ka nahin hai koi

main kisi ki bhi amanat men nahin rah sakta

vaise rahne ko to ḳhush-bash hi rahta huun ‘zafar’

sach jo puchhen to haqiqat men nahin rah sakta