vafa ka rang jo gahra dikha.i deta hai
lahu kuchh us men hamara dikha.i deta hai
hamara gham se ta.alluq bahut purana hai
hamara dard se rishta dikha.i deta hai
ghazal ho dar-o-rasan ho ki bazm-e-ḳhuban ho
har ik jagah vahi chehra dikha.i deta hai
kisi zamane men yaron ka yaar tha vo bhi
vo ek shaḳhs jo tanha dikha.i deta hai
chale the tez bahut ab ye haal hai ‘rahmat’
na manzilen hain na jaada dikha.i deta hai
Leave a Reply