vafā kā rang jo gahrā dikhā.ī detā hai
lahū kuchh us meñ hamārā dikhā.ī detā hai
hamārā ġham se ta.alluq bahut purānā hai
hamārā dard se rishta dikhā.ī detā hai
ġhazal ho dār-o-rasan ho ki bazm-e-ḳhūbāñ ho
har ik jagah vahī chehra dikhā.ī detā hai
kisī zamāne meñ yāroñ kā yaar thā vo bhī
vo ek shaḳhs jo tanhā dikhā.ī detā hai
chale the tez bahut ab ye haal hai ‘rahmat’
na manzileñ haiñ na jaada dikhā.ī detā hai