rah-e-ḳhulus men behtar hai sar jhuka rakhna
vo sar-kashida agar hai to sar siva rakhna
yahi vo soch hai jis ki talash thi mujh ko
ye baat apne ḳhayalon se ab juda rakhna
na qurb-e-zat hi hasil na zaḳhm-e-rusva.i
ajiib lagta hai ab ḳhud se rabta rakhna
tamam shahr ko atish-kada banana hai
dilon ki aag saliqe se ja-ba-ja rakhna
baḌa ajiib hai tahzib-e-irteqa ke liye
tamam umr kisi ik ko ham-nava rakhna
kamal-e-hirs hai jazb-o-talab ki duniya men
badan ko ruuh ki avaz se juda rakhna
buland kar ke zara hauslon ki divaren
diya jala ke hava ko charagh-pa rakhna
shikast-o-reḳht ki duniya men zinda rahne ki
bikhar bikhar ke simaTne ka hausla rakhna
ḳhud apni zaat pe tanqid ke muradif hai
kisi ke samne danista a.ina rakhna
jise mili hai ye daulat vahi samajhta hai
ajiib nemat-e-uzma hai dil dukha rakhna
ho jab bhi jaana kisi ke nigar-ḳhane men
‘nazar’ ḳhayal zara ḳhadd-o-ḳhal ka rakhna
Leave a Reply