zabte aur hi misdaq pe rakkhe hue hain
aj-kal sidq-o-safa taaq pe rakkhe hue hain
vo jo ḳhud marka-e-ishq men utre bhi nahin
shikva paspa.i ka ushshaq pe rakkhe hue hain
bandh rakkha hai mohabbat ne azal se ham ko
so tavajjoh isi misaq pe rakkhe hue hain
daḳhl ankhon ka ulajhne men bahut hai lekin
tohmaten sab dil-e-mushtaq pe rakkhe hue hain
jaane kab silsila-e-ḳhair-o-ḳhabar ka ho zuhur
dhyan ham anfus o afaq pe rakkhe hue hain
dekhiye kaun sa mafhum liya ja.ega
baat kar ke nazar itlaq pe rakkhe hue hain
tabish-e-shauq se alfaz hain raushan ‘gulzar’
ya sitare kaf-e-auraq pe rakkhe hue hain
Leave a Reply