aae hain ‘mir’ munh ko banae ḳhafa se aaj
shayad bigad gai hai kuchh us bevafa se aaj
vashud hui na dil ko faqiron ke bhi mile
khulti nahin girah ye kasu ki dua se aaj
jiine men iḳhtiyar nahin varna ham-nashin
ham chahte hain maut to apni ḳhuda se aaj
saaqi tuk ek mausam-e-gul ki taraf bhi dekh
tapka pade hai rang chaman men hava se aaj
tha ji men us se miliye to kya kya na kahiye ‘mir’
par kuchh kaha gaya na gham-e-dil haya se aaj