Mera Dil Chaak Hua Chaak-E-Gareban Ki Tarah

merā dil chaak huā chāk-e-garebāñ kī tarah

ab gulistāñ nazar aatā hai bayābāñ kī tarah

mere siine meñ munavvar hue yādoñ ke charāġh

bazm-e-ḳhūbāñ kī tarah shahr-e-nigārāñ kī tarah

koī monis koī hamdam koī sāthī na milā

maiñ pareshāñ hī rahā zulf-e-pareshāñ kī tarah

ḳhatm ho jā.egī har raushnī duniyā kī magar

tum chamakte hī rahoge mah-e-tābāñ kī tarah

maiñ ne chāhā ki sambhal jaa.e tabī.at merī

dil Tapaktā hī rahā dīda-e-giryāñ kī tarah

chashm-e-ulfat se na dekhā kabhī duniyā ne mujhe

maiñ khaTaktā hī rahā ḳhār-e-muġhīlāñ kī tarah

mere saaqī tire andāz-e-karam ke sadqe

ab to ‘maikash’ bhī nazar aatā hai insāñ kī tarah

Leave a Comment