Tilok Chand Mahroom
hamare vaste hai ek jiina aur mar jaana
ki ham ne zindagi ko jada-e-rah-e-safar jaana
yakayak manzil-e-afat-e-alam se guzar jaana
Daren kyuun maut se jab hai isi ka naam mar jaana
tiri nazron se gir jaana tire dil se utar jaana
ye vo uftad hai jis se bahut achchha hai mar jaana
javab-e-abr-e-naisan tujh ko ham ne chashm-e-tar jaana
ki har ik qatra-e-ashk-e-chakida ko guhar jaana
talatum aarzu men hai na tufan justuju men hai
javani ka guzar jaana hai dariya ka utar jaana
ham apne rahzan o rahbar the lekin sada-lauhi se
kisi ko rahzan samjhe kisi ko rahbar jaana
main aise rah-rau ki justuju men mar miTa jis ne
tan-e-ḳhaki ko rah-e-ishq men gard-e-safar jaana
lab-e-bam aa.e tum aur un ke chehre ho ga.e phike
qamar ne tum ko ḳhurshid aur sitaron ne qamar jaana
na bhulega hamen ‘mahrum’ sub.h-e-roz-e-mahshar tak
kisi ka maut ke aghosh men vaqt-e-sahar jaana
Leave a Reply