ishq ho jaun pyaar ho jaun
main jo khushbu-e-yar ho jaun
jab bhi niklun main dhundne us ko
dhuul mitti ghubar ho jaun
us ke vaade ka e’tibar karun
phir shab-e-intizar ho jaun
odh luun us ki yaad ki chadar
aur khud par nisar ho jaun
main tira mausam-e-khizan pahnun
aur fasl-e-bahar ho jaun
ek shab us ko is tarah dekhun
daman-e-shab ke paar ho jaun
jo hava tujh ko chhu ke aae main
us ko chhu luun bahar ho jaun
jis ghadi us ka aaina dekhun
us ghadi aks-e-yar ho jaun
phuul tankun libas men us ke
main agar dastkar ho jaun
us ka kajal laga ke ankhon men
masti-e-chashm-e-yar ho jaun
chahta vo bhi hai yahi ‘afroz’
aag pi luun sharar ho jaun
Leave a Reply