tez jab ḳhanjar-e-bedad kiya ja.ega
ham gharibon ka gala yaad kiya ja.ega
ghair ko ḳhush hamen nashad kiya ja.ega
kab talak ye sitam ijad kiya ja.ega
ye to batlao hamen shahr basane vaalo
dil ka virana kab abad kiya ja.ega
aur kya hoga tire ahd-e-sitam men ai dost
roz taaza sitam ijad kiya ja.ega
ye jahan murda-paraston ka jahan hai yaaro
ham na honge to hamen yaad kiya ja.ega
dast-o-bazu se bhi kuchh kaam liya jaa.e ‘hafiz’
ta-ba-kai shikva-e-sayyad kiya ja.ega
Leave a Reply