Kabhi to Sehn-E-Ana Se Nikle Kahin Pe Dasht-E-Malal Aaya

Hilal Fareed

kabhi to sehn-e-ana se nikle kahin pe dasht-e-malal aaya

hamari vahshat pe kaisa kaisa uruuj aaya zaval aaya

adavaten thiin mohabbaten thiin na jaane kitni hi hasraten thiin

magar phir aisa hua ki sab kuchh main ḳhud hi dil se nikal aaya

kabhi ibadat kabhi inayat kabhi dua.en kabhi ata.en

kahin pe dast-e-talab bane ham kahin pe ham tak saval aaya

gulon ke chehre khile hue hain hava men ḳhush-bu mahak rahi hai

ye meri ankhon ne ḳhvab dekha ki sail-e-husn-o-jamal aaya

tamam ranj o mehan ko chhoḌen tumhin ko dekhen tumhin ko sochen

baḌe zamane ke ba.ad dil men ye bhula bisra ḳhayal aaya

ghazal suna.un to daad pa.un magar main tum se bhi kya chhupa.un

tumhi ne saare hunar sikha.e tumhi se rang-e-‘hilal’ aaya