Dil Mera KHugar-E-Alam Hua Jata Hai

dil mirā ḳhūgar-e-ālām huā jaatā hai

ab sitam bhī tirā in.aam huā jaatā hai

zabt-e-ġham maut kā paiġhām huā jaatā hai

dil kī bātoñ meñ mirā kaam huā jaatā hai

nisbat-e-ḳhās to hai zulm pe yuuñ shaad the ham

ye bhī andāz tirā aam huā jaatā hai

terī maḳhmūr nigāhoñ ke tasadduq meñ koī

vāqif-e-rāz-e-mai-o-jām huā jaatā hai

tark-e-ulfat se junūñ mujh ko huā yuuñ hī sahī

husn kyuuñ larza-bar-andām huā jaatā hai

dil jo thā sāġhar-e-sahbā-e-sukūñ ai ‘naḳhshab’

markaz-e-gardish-e-ayyām huā jaatā hai

Leave a Comment