Zindagi Marg Ki Mohlat Hi Sahi

zindagi marg ki mohlat hi sahi

bahr-e-vamanda iqamat hi sahi

dosti vaj.h-e-adavat hi sahi

dushmani bahr-e-rifaqat hi sahi

tuul dete ho adavat ko kyuun

muḳhtasar qissa-e-ulfat hi sahi

rakh kisi vaz.a se ehsan ki ḳhu

mujh ko azar se rahat hi sahi

aap ka bhi nahin chhuTta daman

mere dar pe miri shamat hi sahi

aqibat hashr ko aana ik din

ruuTh jaana tiri aadat hi sahi

kuchh bhi ai baḳht mayassar hai tujhe

ya tajassus se faraghat hi sahi

kucha-e-ghair men chal kar rahiye

gar nahin aish to hasrat hi sahi

yahi taqrib-e-sitam ho ai kaash

har tarah ghair se nafrat hi sahi

ab to uTh aa.e lahad se be-tab

na sahi chaal qayamat hi sahi

yadgari ki koi baat to ho

maut apni tiri ruḳhsat hi sahi

adl-o-insaf-e-qayamat ma.alum

ah-o-fariyad ki fursat hi sahi

ai ‘qalaq’ shukr-e-sitam be-ja kyuun

ah-o-fariyad ki fursat hi sahi