Aisa Nahin Ki Usne Banaya Nahin Mujhe

aisā nahīñ ki us ne banāyā nahīñ mujhe

jo zaḳhm us ko aayā hai aayā nahīñ mujhe

dīvār ko girā ke uThāyā bhī maiñ ne thā

dīvār ne girā ke uThāyā nahīñ mujhe

maiñ ḳhud bhī aa rahā thā jagah DhūñDte hue

yaañ tak ye inhidām hī laayā nahīñ mujhe

merā ye kaam aur kasī ke supurd hai

ḳhud ḳhvāb dekhnā abhī aayā nahīñ mujhe

kal niiñd meñ charāġh ko nārāz kar diyā

sūraj ne aaj sub.h jagāyā nahīñ mujhe

zanjīr lāzmī hai ki zanjīr ke baġhair

chalnā zamīn par abhī aayā nahīñ mujhe

Leave a Comment