raas aa.i hamen na dildari
zindagi ho ga.i hai dukhiyari
haar baiThi huun pyaar ki baazi
main abhi hausla nahin haari
go sitara sahar ka tanha hai
phir bhi deta hai izn-e-bedari
aankh barsi hai yaad men teri
dil men bhaḌki hai koi chingari
koi jugnu to jagta hoga
raat guzri nahin abhi saari
maa.en sahti hain kis qadar dukhḌe
bahnen hoti hain kitni dukhiyari
apna jivan hai is tarah ‘farruḳh’
zard mausam men jaise phulvari
Leave a Reply