Ghar Se Hum Ghar Talak Gae Honge

ghar se ham ghar talak ga.e hoñge

apne hī aap tak ga.e hoñge

ham jo ab aadmī haiñ pahle kabhī

jaam hoñge chhalak ga.e hoñge

vo bhī ab ham se thak gayā hogā

ham bhī ab us se thak ga.e hoñge

shab jo ham se huā muaaf karo

nahīñ pī thī bahak ga.e hoñge

kitne hī log hirs-e-shohrat meñ

daar par ḳhud laTak ga.e hoñge

shukr hai is nigāh-e-kam kā miyāñ

pahle hī ham khaTak ga.e hoñge

ham to apnī talāsh meñ akasr

az samā-tā-samak ga.e hoñge

us kā lashkar jahāñ-tahāñ ya.anī

ham bhī bas be-kumak ga.e hoñge

‘jaun’ allāh aur ye aalam

biich meñ ham aTak ga.e hoñge

Leave a Comment