Yaqin Ki Had Mein Hun Ya Warta-E-Guman Mein Hun

Murtaza Ali Shad

yaqin ki had men huun ya varta-e-guman men huun

mujhe ḳhabar hai ki main huun par imtihan men huun

vo par sameT ke ḳhush hai ki pa gaya mujh ko

main zaḳhm kha ke huun nazan ki asman men huun

koi to tha ki jo patthar bana gaya chhu kar

mujhe batao main kis shaḳhs ki amaan men huun

hava ki aankh se guzrun to ma.arka Thahre

misal-e-tir abhi halqa-e-kaman men huun

huun muntazir kisi lams-nigah ka kab se

main ik kitab ki surat kisi dukan men huun

badan hai barf magar jal raha huun lakḌi sa

main apne ghar men huun ya ghair ke makan men huun

na kar talash ki sahil nahin mira maskan

main har ghaḌi tiri kashti ke badban men huun