kabhi mausam saath nahin dete kabhi bel munder nahin chadhti
lekin yahan vaqt badalne men aisi koi der nahin lagti
kahin andar bazm sajae hue kahin bahar ḳhud ko chhupae hue
tire zikr ka kaam nahin rukta tiri yaad ki umr nahin Dhalti
ik ḳhvab-numa tamsil ka dhundla aks hai aina-ḳhane men
vo husn dikhai nahin deta aur phir bhi nigah nahin hatti
kai sadiyan biit gaiin mujh men tire qurb ki be-lazzat rut men
mira jism namaz ka aadi hai miri ruuh namaz nahin padhti