na sunne men na kahin dekhne men aaya hai
jo hijr o vasl mire tajribe men aaya hai
na.e sire se jal uTThi hai phir purani aag
ajiib lutf tujhe bhulne men aaya hai
na haath mere na ankhen miri na chehra mira
ye kis ka aks mire aa.ine men aaya hai
javaz rakhta hai har ek apne hone ka
yahan pe jo hai kisi silsile men aaya hai
hai vaqi.a hadaf-e-sail-e-ab tha koi aur
mira makan to bas raste men aaya hai
vo raz-e-vasl tha jo niind men khula mujh par
ye ḳhvab-e-hijr hai jo jagte men aaya hai
‘jamal’ dekh ke jiita tha jo kabhi tujh ko
kahin vo shaḳhs bhi kya dekhne men aaya hai
Leave a Reply