Siraj Faisal Khan
zamin par bas lahu bikhra hamara
abhi bikhra nahin jazba hamara
hamen ranjish nahin dariya se koi
salamat gar rahe sahra hamara
mila kar haath suraj ki kiran se
muḳhalif ho gaya saaya hamara
raqib ab vo hamare hain jinhonne
namak ta-zindagi khaya hamara
hai jab tak saath banjara-mizaji
kahan manzil kahan rasta hamara
ta.alluq tark kar ke ho gaya hai
ye rishta aur bhi gahra hamara
bahut koshish ki lekin juḌ na paaya
tumhare naam men aadha hamara
idhar sab ham ko qatil kah rahe hain
udhar ḳhatre men tha kunba hamara
Leave a Reply