ab se pahle vo miri zaat pe taari to na tha
dil men rahta tha magar ḳhuun men jaari to na tha
nabz chalti hai to qadmon ki sada aati hai
is qadar zaḳhm-e-juda.i kabhi kaari to na tha
vo to badal ka barasna hai anasir ka usuul
varna ashkon ka namak aankh pe bhari to na tha
dil men khilte hain tiri yaad ke e.ajaz se phuul
is men kuchh sha.iba-e-bad-e-bahari to na tha
ye bhi andar ka koi rog hai varna ham ko
umr-bhar hausla-e-nala-o-zari to na tha
Leave a Reply