Abbas Dana
gardish-e-dauran se ik lamha churane liye
sochna padta hai kitna muskurane ke liye
kitni zahmat jhelta hai ek muflis mezban
ghar ki bad-hali ko mehman se chhupane ke liye
bhuuk un ko le gai hai kar-khanon ki taraf
ghar se bachche nikle the schōl jaane ke liye
khuun apna bech kar aaya hai ik majbur baap
betiyon ke haath par mehndi lagane ke liye
zindagi jalti hai kitni dozakhon ki aag men
char-divaron ki ik jannat banane ke liye
haae tyauharon ne logon ko bhikari kar diya
qarz lena padta hai khushiyan manane ke liye
ho rahe hain aaj daana andhiyon men mashvare
sirf mere ghar ka ik dipak bujhane ke liye
Leave a Reply