Duniya-E-Sitam Zer-O-Zabar Ho Ke Rahegi

Poet

duniya-e-sitam zer-o-zabar ho ke rahegi

jab raat hui hai to sahar ho ke rahegi

talvar se jaage ki nasim-e-sahari se

hushiyar magar ruh-e-bashar ho ke rahegi

ban ja.enge gul raah men bikhre hue kanTe

himmat hai to takmil-e-safar ho ke rahegi

ye husn-e-tasavvur mujhe marne nahin deta

ik din miri janib vo nazar ho ke rahegi

tum ḳhun-e-tamanna ko mire laakh chhupao

ik roz zamane ko ḳhabar ho ke rahegi

ye baat alag hai ki sahar tak na rahen ham

lekin ye yaqin hai ki sahar ho ke rahegi

‘sharib’ main chhupun laakh zamane ki nazar se

lekin ḳhabar-e-aib-o-hunar ho ke rahegi