Shahid Latif
aaj bhi jis ki hai ummid vo kal aa.e hue
in daraḳhton pe zamana hua phal aa.e hue
koi chehra hai jo lagta na ho murjhaya hua
koi peshani hai jis par na huun bal aa.e hue
ik nazar dekh le shayad tujhe yaad aa jaa.en
ham vahi hain tiri mahfil se nikal aa.e hue
jaise har chiiz nigahon men Thaharna chahe
dekh lena kabhi mausam pe ghazal aa.e hue
kya gulabon ki vo albeli ruten ruuTh ga.iin
in dinon hadd-e-nazar tak hain kanval aa.e hue
lafz mafhum se begana hain muddat guzri
apne hisse men ghazal jaisi ghazal aa.e hue
haa.e vo log jo har vaqt nazar aate the
ḳhaak uḌaa.e hue chehre pe bhi mal aa.e hue
Leave a Reply