vo ho ilaj-e-dard mudava kahen jise
aisa to ho koi ki masiha kahen jise
pursan-e-hal koi nahin jis ka naam len
ik dard dil hi hai ki shanasa kahen jise
mushkil ye hai ki aap to sunte hi kuchh nahin
rudad-e-ishq vo ki fasana kahen jise
jalve se dekhiye kahin ankhen jhapak na jaa.en
yuun chashm va ho zauq-e-tamasha kahen jise
allah aisi de tujhe taufiq ai junun
sar men vo dhun sama.e ki sauda kahen jise
sab hasraton ko ḳhaak men zalim mila diya
ab dil men kya raha ki tamanna kahen jise
ye bar-e-zindagi kahin halka na ‘shauq’ ho
itna to ho ki hasil-e-duniya kahen jise
Leave a Reply