har taraf parda-dar-e-zulmat hai
ik tabassum ki phir zarurat hai
Thahri Thahri hai vaqt ki raftar
alam-e-ghaur men mashiyyat hai
hai guman kya yaqin ka saaya
aur yaqin vahime ki shiddat hai
ishq bhi zindagi ki la.anat tha
aql bhi zindagi ki la.anat hai
ḳhud-numa.i men jo hijab rahe
tirgi us ki ik alamat hai
shor-e-tahsin-e-narava se ‘jamil’
ye ḳhamoshi basa-ghanimat hai
Leave a Reply