Iftikhar Arif
koi muzhda na basharat na dua chahti hai
roz ik taaza ḳhabar ḳhalq-e-ḳhuda chahti hai
mauj-e-ḳhun sar se guzarni thi so vo bhi guzri
aur kya kucha-e-qatil ki hava chahti hai
shahr-e-be-mehr men lab-basta ghulamon ki qatar
na.e a.in-e-asiri ki bina chahti hai
koi bole ke na bole qadam uTThen na uThen
vo jo ik dil men hai divar uTha chahti hai
ham bhi labbaik kahen aur fasana ban jaa.en
koi avaz sar-e-koh-e-nida chahti hai
yahi lau thi ki ulajhti rahi har raat ke saath
ab ke ḳhud apni havaon men bujha chahti hai
ahd-e-asudgi-e-jan men bhi tha jaan se aziiz
vo qalam bhi mire dushman ki ana chahti hai
bahr-e-pamali-e-gul aa.i hai aur mauj-e-ḳhizan
guftugu men ravish-e-bad-e-saba chahti hai
ḳhaak ko ham-sar-e-mahtab kiya raat ki raat
ḳhalq ab bhi vahi naqsh-e-kaf-e-pa chahti hai
Leave a Reply