main badalte mausamon ke rang se bezar huun
har na.i rut se chaman men barsar-e-paikar huun
husn-e-yusuf ke ḳharidaro baḌho meri taraf
main adab ke da.ere men misr ka bazar huun
vaqt ke hathon bigaḌta huun sanvarne ke liye
main samundar ke kinare ret ki divar huun
kaun sa hai marhala jo mujh se tai paata nahin
main ḳhud apne raste ki manzil-e-dushvar huun
jis ko paḌhna hai mujhe vo pahli fursat men paḌhe
sub.h ke hathon men pichhli raat ka aḳhbar huun
ḳhvab hai mere liye mauj-e-hava ki tazgi
main shajar par zard patte ki tarah bedar huun
meri gardan par ‘saba’ hai apni shohrat ka lahu
main amal ki raushni men jurm ka iqrar huun
Leave a Reply