Aftab Shamsi
koi achchhi si ghazal kanon men mere ghol de
qaid-e-tanhai men huun main mujh ko aa kar khol de
ye tanav jism ka badhne nahin dega tujhe
chust pairahan men tu apne zara sa jhol de
ek ladki jal rahi hai chilchilati dhuup men
koi badal aa ke us par apni chhatri khol de
raah takte jism ki majlis men sadiyan ho gaiin
jhank kar andhe kunen men ab to koi bol de
main kharidar-e-vafa huun tu giraftar-e-vafa
meri banhon men thirakta jism apna tol de
der tak banjara kal koi sada deta raha
kaun hai bazar men jo jins-e-dil ka mol de
jaane kab se faisla qismat ka sunne ke liye
muntazir baitha huun main tu apni mutthi khol de
sher achchhe hon to be-gae bhi mil jaati hai daad
tu khudara lahn ke hathon men mat kashkol de
Leave a Reply