tujhe izhar-e-mohabbat se agar nafrat hai
tu ne honton ko larazne se to roka hota
be-niyazi se magar kanpti avaz ke saath
tu ne ghabra ke mira naam na puchha hota
tere bas men thi agar mashal-e-jazbat ki lau
tere rukhsar men gulzar na bhadka hota
yuun to mujh se huiin sirf ab-o-hava ki baten
apne tuute hue fiqron ko to parkha hota
yunhi be-vajh thitakne ki zarurat kya thi
dam-e-rukhsat main agar yaad na aaya hota
tera ghammaz bana khud tira andaz-e-khiram
dil na sambhla tha to qadmon ko sambhala hota
apne badle miri tasvir nazar aa jaati
tu ne us vaqt agar aaina dekha hota
hausla tujh ko na tha mujh se juda hone ka
varna kajal tiri ankhon men na phaila hota
Leave a Reply