junun hi se magar bilkul dil-e-divana ḳhali hai
na manunga asar se na.ara-e-mastana ḳhali hai
muravvat se tiri ham bekason ki sharm rah jaati
bhari mahfil men saaqi ik yahi paimana ḳhali hai
dila Dar hai kahin ka.abe pahunch kar tu na kah baiThe
ki vapas chal yahan se ab to ye but-ḳhana ḳhali hai
hamen zauq-e-asiri chhoḌta hai kab gulistan men
qafas men jab tak ai sayyad koi ḳhana ḳhali hai
ye maana ham ne ‘jauhar’ shahr chhoḌa par kahan jaa.en
vo tere dam se tha abad ab virana ḳhali hai
Leave a Reply