Dil Ayubi
Dhang jiine ka na marne ki ada mangi thi
ham ne to jurm-e-mohabbat ki saza mangi thi
kya ḳhabar thi ki andheron ko bhi sharma denge
jin ujalon ke liye ham ne dua mangi thi
ishq men raz-e-baqa kya hai ḳhabar thi ham ko
ham ne kuchh soch samajh kar hi fana mangi thi
mangne valon men shamil to the ham bhi lekin
ham ne us dar pe faqat tarz-e-nava mangi thi
ban ga.i husn-e-talab bhi to muamma ai ‘dil’
dard manga tha vo samjhe ki dava mangi thi
Leave a Reply