dekh kar har dar-o-divar ko hairan hona
vo mira pahle-pahal daḳhil-e-zindan hona
qabil-e-did hai us ghar ka bhi viran hona
jis ke har gosha men maḳhfi tha bayaban hona
ji na uTThunga hai bekar pasheman hona
jaao ab ho chuka jo kuchh tha miri jaan hona
vahima mujh ko dikhata hai junun ke saman
nazar aata hai mujhe ghar ka bayaban hona
uf mire ujḌe hue ghar ki tabahi dekho
jis ke har zarre pe chhaya hai bayaban hona
hadse donon ye aalam men aham guzre hain
hadse donon ye aalam men aham guzre hain
mera marna tiri zulfon ka pareshan hona
al-hazar gor-e-ghariban ki Darauni raten
aur vo un ke ghane baal pareshan hona
rat-bhar soz-e-mohabbat ne jalaya mujh ko
tha muqaddar men charagh-e-shab-e-hijran hona
kyuun na vahshat men bhi paband-e-mohabbat rahta
tha bayaban men mujhe qaidi-e-zindan hona
hoga ik vaqt men ye vaqi.a-e-tariḳhi
yaad rakhna mire kashane ka viran hona
kuchh na puchho shab-e-va.ada mire ghar ki raunaq
allah allah vo saman se saman hona
josh men le ke ik angḌa.i kisi ka kahna
tum ko aata hi nahin chak-gareban hona
un ki us koshish-e-be-had ka pata deta hai
charasazon ka mire laash pe giryan hona
alam-e-ishq ki fitrat men ḳhalal aata hai
maan luun hazrat-e-naseh ka gar insan hona
surḳh Dori tiri ankhon ki ilahi tauba
chahiye tha inhen paivast-e-rag-e-jan hona
ho chalen aap ke bimar ki ankhen be-nur
qahr tha sub.h ke taare ka numayan hona
main karun zabt idhar un ko pasina aa.e
chahiye yuun gham-e-pinhan ko numayan hona
allah allah ye saliqa tira ai sho.ala-e-tur
kis tarah tu ne chhupaya hai numayan hona
un se karta hai dam-e-naz.a vasiyyat ye ‘aziz’
ḳhalq ro.egi magar tum na pareshan hona
Leave a Reply