Faiz Khalilabadi
yuun pahunchna hai mujhe ruuh ki tughyani tak
jis tarah rassi se jaata hai ghaḌa paani tak
kaTni paḌti hai naḳhun se takan ki zanjir
yuun hi aati nahin mushkil koi asani tak
zindagi tujh se bana.e hue rishte ki havas
mujh ko le aa.i hai duniya ki pareshani tak
aise jarrahon ka qabza hai suḳhan par afsos
kar nahin sakte jo lafzon ki musalmani tak
apne andar main kiya karta huun raaja ki talash
is vasile se pahunchna hai mujhe raani tak
aise lafzon ko bhi be-aib banaya ham ne
jin ki jaa.ez hi nahin hoti thi qurbani tak
husn ka paanv dabati hai jahan shoḳh hava
ishq le aaya hai mujh ko isi virani tak
‘faiz’ ham log hain ik aisi kachehri ke vakil
faujdari se pahunchte hain jo divani tak
Leave a Reply