umr ki dhalti hui dopahar men
thandi hava ke jhonke ka ehsas bhi
aadmi ko taza-dam kar deta hai
aur agar sach-much khunuk havaen
thakan-nasib jism se khelne lagen
to shab ki tariki khizab jaisi dikhai deti hai
as-pas gardish karta hua sannata
arzuon ki gahmagahmi se gunjne lagta hai
khvab taabiron ki talash men bhatakne lagte hain
badan ki uktahaten chaupal ke shor-sharabe men duub jaati hain
dhalte hue suraj ki laali se suhag jode ki khushbu
aane lagti hai
lekin khvabida arzuon ki shahrah se guzarte hue
log
apni manzil ka pata bhuul jaate hain
isi pata bhulne ko samaj
dharm aur mazhab ki aad le kar
aisi ba-huda galiyan deta hai
jo tvaifon ke mohallon men bhi nahin
sunai detin
Leave a Reply