boiye mazra-e-dil men jo inayat ke biij
to na hon sabz kabhi apni shikayat ke biij
ham ne is mazraa-e-hasti men kiye hain jo amal
ek din khinchenge sar un ki mukafat ke biij
aah dahqan-e-falak ki kahun kya bad-tukhmi
khak-e-adam men ye nit bove hai afat ke biij
baghban jab taiin haath aave tire bazr-ul-banj
meri turbat pe na bo aur nabatat ke biij
valad-ul-qahba se puchho na, tiri zaat hai kya
biij men us ke hain makhlut kai zaat ke biij
daagh siine ke mire turfa dikhate hain bahar
hain ye boe hue kis nakhl-e-tilismat ke biij
bistar-e-shaikh pe jo konch ki phalliyan niklin
the chhupae hue shayad usi bad-zat ke biij
un ko kya hove hai juz rizq-e-pareshan hasil
ja-ba-ja bote phiren hain jo mulaqat ke biij
‘mushafi’ is se bhi behtar ghazal ik aur suna
vadi-e-fikr men bo kar tu khayalat ke biij
Leave a Reply