ajab sukut sa taari hai dil ke ḳhanon men
ki dhaḌkanen bhi miri gunjti hain kanon men
zara si tirgi dekhen jo asmanon men
tuyur lauTne lagte hain ashiyanon men
ik ek kar ke sabhi kuuch karte jaate hain
koi paret hai kya shahr ke makanon men
vo jin men dekhne se dil ka haal dikh jaa.e
koi vo aa.ine rakh de nigar ḳhanon men
darun-e-dil jo tiri yaad ke dafine hain
bahut se qimti moti hain in ḳhazanon men
suḳhan ke shahr men kuchh bhi naya nahin aaya
purana maal hi bikta hai sab dukanon men
kisi bhi haal men us ko mana ke le aa.uun
palaT sakun jo main guzre hue zamanon men
gulab suukh ke shaḳhon se jhaḌ ga.e kab ke
ye chand ḳhaar hi baaqi hain phul-danon men
kabhi jo pyaar mohabbat ki baat niklegi
hamara naam bhi aa.ega dastanon men
vo jis men jaan se baḌh kar thi yaar ki izzat
‘zaki’ vo ashiqi milti hai ab fasanon men
Leave a Reply