danista jo ho na sake nadani se ho jaata hai
aag ka dariya paar baḌi asani se ho jaata hai
had-e-nazar tak ik tanha.i ḳhaak uḌati phirti hai
sahra be-bas apni hi virani se ho jaata hai
jitni umr sarabon ka pichha karne men guzarti hai
itna gahra pyaas ka rishta paani se ho jaata hai
ghar se nikalna bhi mushkil hai ghar men rahna bhi mushkil hai
kaisa mausam barish ki man-mani se ho jaata hai
rone se dil halka to ho jaata hai lekin socho
vo nuqsan jo ashkon ki arzani se ho jaata hai
jhiil ki gahri ḳhamoshi bhi hoti hai mashkuk magar
dariya rusva maujon ki tughyani se ho jaata hai
Leave a Reply