nigah o dil ke tamam rishte faza-e-alam se kaT ga.e hain
juda.iyon ke azaab mausam bisat-e-hasti ulaT ga.e hain
vo jis ki yadon se sha.eri ka har ek misra sajaya ham ne
kitab-e-jan ke tamam safhe usi ke hathon se phaT ga.e hain
yahan pe kuchh bhi nahin hai baaqi tu aks apna talash mat kar
miri nigahon ke aa.ine ab ghubar-e-furqat se aT ga.e hain
yahi asasa the zindagi ka ye ḳhvab hi the mira sahara
tire taghaful ke sang-rezo se kirchiyon men jo baT ga.e hain
ye mo.ajaza to nahin hai koi ḳhiraj hai apni himmaton ka
ki apne raste men aane vaale tamam kohsar hiT ga.e hain
ḳhush aa gaya hai safar men jiina isi liye to shakil-‘jazib’
jahan se manzil qarib dekhi vahin se vapas palaT ga.e hain
Leave a Reply