ik subh hai jo hui nahin hai
ik raat hai jo kati nahin hai
maqtulon ka qaht pad na jaae
qatil ki kahin kami nahin hai
viranon se aa rahi hai avaz
takhliq-e-junun ruki nahin hai
hai aur hi karobar-e-masti
ji lena to zindagi nahin hai
saaqi se jo jaam le na badh kar
vo tishnagi tishnagi nahin hai
ashiq-kushi o fareb-kari
ye sheva-e-dilbari nahin hai
bhukon ki nigah men hai bijli
ye barq abhi giri nahin hai
dil men jo jalai thi kisi ne
vo sham-e-tarab bujhi nahin hai
ik dhuup si hai jo zer-e-mizhgan
vo aankh abhi uthi nahin hai
hain kaam bahut abhi ki duniya
shaista-e-admi nahin hai
har rang ke aa chuke hain firaun
lekin ye jabin jhuki nahin hai
Leave a Reply