ik barg barg din ki ḳhabar chahiye mujhe
main shaḳh-e-shab-zada huun sahar chahiye mujhe
meri talab dahakte alaav na the kabhi
ambar-e-ḳhas huun ek sharar chahiye mujhe
kab tak sulagti ret pe behis paḌa rahun
is gul-zamin ki samt safar chahiye mujhe
sau baar jism-o-jan ko banana paḌa saval
is tajribe se ab to hazar chahiye mujhe
vo rabt-e-dosti jise pa.inda kah saken
milti nahin ye chiiz magar chahiye mujhe
mazmun-e-agahi huun bayan chahta huun main
afsun-e-be-asar huun asar chahiye mujhe
Leave a Reply