kya hua rangini-e-sub.h-o-masa baaqi nahin
apne hi ghar men vo pahli si faza baaqi nahin
arzuon ka koi bhi silsila baaqi nahin
mas.ala ye hai ki koi mas.ala baaqi nahin
aa gaya hai ab sava neze pe dekho aftab
apna saaya bhi zamin par zer-e-pa baaqi nahin
manzilen avaz deti hain ki ham hain muntazir
qafile valon men lekin hausle baaqi nahin
be-mahaba us ke aane ka natija ye hua
a.ina-ḳhane men koi aa.ina baaqi nahin
kitni mashshaqi se us ne saaf do TukḌe kiye
jism men ab ek bhi tasma laga baaqi nahin
ham to chhoḌ aa.e the gahre naqsh rahon men ‘habab’
va.e-hasrat ek bhi ab naqsh-e-pa baaqi nahin
Leave a Reply