hamesha ek si raftar ho aisa nahin hota
mire hi haath men patvar ho aisa nahin hota
main saare pech-o-ḳham ko rafta rafta jaan ja.unga
koi rasta sada dushvar ho aisa nahin hota
samaji tane-bane men juda mansab juda qadren
sabhi ka ek hi me.aar ho aisa nahin hota
chalo aao milen baiThen karen kuchh pyaar ki baten
hamesha talḳh hi guftar ho aisa nahin hota
tum apne ḳhanjar-o-nashtar liye tayyar baiThe ho
abhi hi siina bhi tayyar ho aisa nahin hota
ho vaz.a muḳhtalif jab Topiyon ki ‘nazr’ to suniye
vo majlis ḳhatm be-takrar ho aisa nahin hota
Leave a Reply