Iliyas Babar Aawan
apna apna dukh batlana hota hai
miTTi se tasvir men aana hota hai
meri sub.h zara kuchh der se hoti hai
mujhe kisi ko ḳhvab sunana hota hai
na.e na.e manzar ka hissa banta huun
jaise jaise jism purana hota hai
ik chiḌiya mujh se bhi pahle uThti hai
jaise us ko daftar jaana hota hai
yaar kitaben kitni jhuTi hoti hain
in men koi aur zamana hota hai
ghar ke andar itni galiyan paḌti hain
kabhi-kabhar hi bahar jaana hota hai
Leave a Reply