zor us par hai na halat pe qaabu yaaro
jaane ab kya ho mulaqat ka pahlu yaaro
kitne zaḳhmon ke tabassum ka pata dete hain
meri palkon pe sulagte hue jugnu yaaro
zaḳhm is taur se mahke hain sar-e-sham-e-firaq
duur tak phail ga.i dard ki ḳhushbu yaaro
kitne ḳhvabon ko nichoḌa hai to un ankhon se
aaj Tapka hai ye jalta hua aansu yaaro
donon aalam miri banhon men simaT aa.e the
raat shanon pe pareshan the vo gesu yaaro
log kahte the na pighlega vo patthar ‘shahid’
tum ne dekha mire ash.ar ka jaadu yaaro
Leave a Reply