Ayan Donon Se Takmil-E-Jahan Hai

ayaan donon se takmil-e-jahan hai

zamin gum ho to phir kya asman hai

tilsmati koi qissa hai duniya

yahan har din nai ik dastan hai

jo tum ho to ye kaise maan luun main

ki jo kuchh hai yahan bas ik guman hai

saron par asman hote hue bhi

jise dekho vahi be-saeban hai

kisi dharti ki shayad ret hogi

hamare vaste jo kahkashan hai

agar tha chand-roza mausam-e-gul

to phir do chaar hi din ki ḳhizan hai

jise umr-e-ravan kahte hain ‘amabar’

chalo dekhen kahan tak raegan hai

Leave a Comment