iman-navaz gardish-e-paimana ho gai
ham se bhi ek laghzish-e-mastana ho gai
koi to baat shama ke jalne men thi zarur
jis par nisar hasti-e-parvana ho gai
sad-shukr aaj ho to gai un se guftugu
ye aur baat hai ki harifana ho gai
allah re ashk-bari-e-sham-e-shab-e-firaq
jo sub.h hote hote ik afsana ho gai
‘hairat’ ke gham-kade men khushi ka guzar kahan
aap aa gae to raunaq-e-kashana ho gai
Leave a Reply