Khul Ke Barasna Aur Baras Kar Phir Khul Jaana dekha Hai

Ajmal Siddiqi

khul ke barasna aur baras kar phir khul jaana dekha hai

ham se puchho!! un ankhon ka ek zamana dekha hai

tum ne kaise maan liya vo thak kar baiTh gaya hoga

tum ne to ḳhud apni ankhon se vo divana dekha hai

manzil tak pahunchen ki na pahunchen raah magar apni hogi

tu rahne de vaaiz tera raah batana dekha hai

dhuul ka ik zarra na uḌe avaz kare parchhain bhi

maut bhi aa kar marti nahin thi vo virana dekha hai

gulshan se ham siikh na paae vaqti ḳhushiyon ko jiina

jabki ham ne fasl-e-gul ka aana jaana dekha hai

dil to saada hai teri har baat ko sachcha manta hai

aql ne baten karte tera aankh churana dekha hai

lafz dava hai lekin is ke saath hi kuchh parhez bhi hai

lafz ke baais pal men khona pal men paana dekha hai