Sar-E-KHayal Main Jab Bhul Bhi Gai Ki Main Hun

Saima Esma

sar-e-ḳhayal main jab bhuul bhi ga.i ki main huun

achanak ek ajab baat ye suni ki main huun

talash kar ke mujhe luTne ko tha koi

mire vajud ki ḳhushbu pukar uThi ki main huun

ki tirgi men pali aankh ko yaqin aa jaa.e

zara buland ho ahang-e-raushni ki main huun

vo ḳhali jaan ke ghar luTne ko aaya tha

mare adu ko ḳhabar aaj ho ga.i ki main huun

na-jane kaisi nigahon se maut ne dekha

hui hai niind se bedar zindagi ki main huun

lapeT do saf-e-matam uTha rakho nauhe

pukarta sar-e-mahshar suna koi ki main huun