Bagh-E-Jahan Ke Gul Hain Ya Khaar Hain To Hum Hain

Khwaja Meer Dard

bagh-e-jahan ke gul hain ya khaar hain to ham hain

gar yaar hain to ham hain aghyar hain to ham hain

dariya-e-maarifat ke dekha to ham hain sahil

gar vaar hain to ham hain aur paar hain to ham hain

vabasta hai hamin se gar jabr hai o gar qadr

majbur hain to ham hain mukhtar hain to ham hain

tera hi husn jag men har-chand maujzan hai

tis par bhi tishna-kam-e-didar hain to ham hain

alfaz-e-khalq ham bin sab mohmalat se the

maani ki tarah rabt-e-guftar hain to ham hain

auron se to girani yak-lakht uth gai hai

ai ‘dard’ apne dil ke gar baar hain to ham hain